എളവാത്ത പുസ്തകങ്ങളുള്ള ഗ്രന്ഥശാല

ചിത്രത്തിനു കടപ്പാട്: ഭാസഭാരതി

തിങ്കളാഴ്ച കാവാലത്തിന്റെ കർണ്ണഭാരം തിരുവനന്തപുരത്ത് അരങ്ങേറുന്നുണ്ട്. അസുലഭാവസരമാണ്. ഒരു പ്രശ്നം: നാടകം സംസ്കൃതമാണ്. തർജ്ജമ വേണം. വിഷ്ണുനാരായണന്‍ നമ്പൂതിരി ചെയ്തിട്ടുണ്ട്. വെള്ളിയാഴ്ച രാവിലെ സ്റ്റെയ്റ്റ് സെൻട്രൽ ലൈബ്രറി എന്നറിയപ്പെടുന്ന പബ്ലിക് ലൈബ്രറിയിലേക്കു വിട്ടു. നാടകങ്ങളുടെ ഭാഗം മുഴുവന്‍ തപ്പി. ഭാസന്‍ ഇല്ല. ഭാസി (മടവൂര്‍) ഉണ്ട്. ഭാസി (തോപ്പില്‍) ഒരു തട്ടു നിറയെ. (വി)ഷ്ണുനാരായണന്‍ ഇല്ല. ജീവനക്കാരിയോട് അന്വേഷിച്ചപ്പോള്‍ അവിടെയല്ല, സംസ്കൃതം നാടകങ്ങളുടെ വിഭാഗത്തില്‍ ഉണ്ടാകും എന്നു പറഞ്ഞു കാണിച്ചുതന്നു. ചിലപ്പോള്‍ സ്ഥാനം തെറ്റി മുകളിലോ താഴെയോ ആകാം. സംസ്കൃതത്തിന്റെ തട്ടില്‍ ഇല്ല. സ്ഥാനം മാറിവന്ന കവിത, പഠനം, ജീവചരിത്രം, നോവല്‍ ഒക്കെ ഉണ്ട്. താഴെയും മുകളിലും മറ്റു പരിഭാഷാനാടകങ്ങള്‍. കർണ്ണാട്, ടാഗോര്‍, ഷേക്സ്പിയര്‍, ഇബ്സന്‍ ഒക്കെ തപ്പിപ്പെറുക്കി അരമുക്കാല്‍ മണിക്കൂര്‍ കഴിഞ്ഞപ്പോള്‍ കർണ്ണഭാരം കിട്ടി. ചെക്ക്-ഔട്ട് ചെയ്യാന്‍ ചെന്നപ്പോള്‍ പറഞ്ഞു തരാന്‍ പറ്റില്ല, പുസ്തകത്തിനു കേടുപാടുണ്ട്. വിവരമെല്ലാം അറിയിച്ചു: തിങ്കളാഴ്ച നാടകം കാണേണ്ടതാണ്. കുറേ തപ്പിയിട്ടാണ് കിട്ടിയത്. മാഡത്തിനോടു സംസാരിക്കാന്‍ പറഞ്ഞു ലൈബ്രേറിയന്റെ നേരെ ചൂണ്ടി. കദനകഥ മുഴുവന്‍ ആവർത്തിച്ചു. ഒരു അക്ഷരപ്രേമിയുടെ, കലാപ്രേമിയുടെ വേദന അവര്‍ക്കറിയാതെ വരുമോ? “എളവിയതാണ്,” അവര്‍ താളുകള്‍ അടര്‍ത്തിയെടുത്തു കാണിച്ചു. “തരാന്‍ പറ്റില്ല.”

അമർഷത്തോടെ വീട്ടിൽച്ചെന്ന് ഇന്റർനെറ്റില്‍ നോക്കി. പത്തുമിനിറ്റുകൊണ്ട് സാധനം കിട്ടി. ഭാസനാടകങ്ങളുടെ മുഴുവന്‍ ഇംഗ്ലീഷ് പരിഭാഷ. സംശയമുണ്ടെങ്കില്‍ ഒത്തുനോക്കാന്‍ സംസ്കൃതം മൂലം വേറെ ഒരിടത്ത്. പബ്ലിക് ലൈബ്രറിവരെ പോകാനും, തപ്പിയെടുക്കാനും, വാദിക്കാനും, അമർഷംകൊള്ളാനും, പോസ്റ്റിടാനും ചെലവാക്കിയ സമയമുണ്ടായിരുന്നെങ്കില്‍ കർണ്ണഭാരം ഇതിനകം വായിച്ചു കഴിഞ്ഞേനെ.
<< അനുഭവം

ഭാരതാംബ

ചിത്രത്തിനു കടപ്പാട്: നവാ ബിഹാന്‍

ഹിമാദ്രിതുംഗശേഖരാം, സമുദ്രഭംഗനൂപുരാം,
തമാലനീലവാസസാം, സുമാകരൈർസുവാസിതാം,
ഉമാ, ശചീ, സരസ്വതീ, രമാമുഖാംഗനാനുതാം
നമാമി ഭാരതാംബികാം തമോഽരി കോടി ഭാസ്വരാം.

ഹിമാലയമാകുന്ന ഉന്നതമായ കിരീടത്തോടു കൂടിയവളും സമുദ്രതരംഗങ്ങളാകുന്ന നൂപുരങ്ങളോടു കൂടിയവളും പച്ചിലമരങ്ങളാൽ പുടവചാര്‍ത്തിയവളും സുഗന്ധപുഷ്പങ്ങളാൽ സൌരഭ്യം ചാര്‍ത്തിയവളും ശ്രീപാര്‍വ്വതി, മഹാലക്ഷ്മീ, സരസ്വതി, ഇന്ദ്രാണി തുടങ്ങിയവരാൽ സ്തുതിക്കപ്പെടുന്നവളും കോടി സൂര്യന്മാരുടെ ശോഭയുള്ളവളുമായ ഭാരതാംബികയെ ഞാൻ നമിക്കുന്നു.


<< ശ്ലോകങ്ങള്‍

ഗുഹകളില്‍ വസിക്കുന്ന മനുഷ്യര്‍

കാനിൽ മികച്ച ചിത്രമായി തെരഞ്ഞെടുക്കെപ്പെട്ട ശീതകാലനിദ്ര (വിന്‍റർ സ്ലീപ്പ്)യെക്കുറിച്ചുള്ള ലേഖനം വെള്ളക്കാക്കയില്‍.

<< കണ്ടെഴുത്ത്

തന്നാണ്ടത്തെ സിനിമാവിളവെടുപ്പ്

പണ്ടുപണ്ട്, ദിനോസറുകള്‍ക്കും ചലച്ചിത്രോത്സവങ്ങള്‍ക്കും മുമ്പ്, ഡിവിഡിയ്ക്കും കേബിള്‍ ടിവിയ്ക്കും മുമ്പ്, ഒരു കൊല്ലത്തെ ചലച്ചിത്രവിളവെടുപ്പിന്റെ രേഖ. പഴയ ഡയറിയില്‍ കുറിച്ചിട്ടിരുന്നത്. എസ്. എഫ്. എസ്. എന്നു പറഞ്ഞാല്‍ അന്ന്‍ ഒരു കെട്ടിടനിര്‍മ്മാണക്കമ്പനിയുടെ പേരായിരുന്നില്ല, തിരുവല്ലയിലെ ഒരേ ഒരു ഫിലിം സൊസൈറ്റിയുടെ പേരായിരുന്നു. തിരുവല്ലയില്‍ ടിവി സംപ്രേഷണം എത്തിയിട്ടില്ലാത്തതിനാല്‍ ആര്‍ട്ട്സിനിമ കാണാന്‍ ഒരേയൊരു മാര്‍ഗ്ഗം.

ചെറിയ കറുത്ത കുത്തിന്റെ അര്‍ത്ഥം ഇഷ്ടപ്പെട്ടു എന്നാണ്. കാലം കഴിയുമ്പോള്‍ ഇഷ്ടങ്ങള്‍ മാറുന്നു. അന്ന്‍ ഇഷ്ടപ്പെട്ട "ആരാന്‍റെ മുല്ല, കൊച്ചുമുല്ല" യും "ഇ.റ്റി."യും "ഏക്‌ ദൂജേ കേലിയേ"യും ഏറെക്കുറെ പൂര്‍ണ്ണമായി മറന്നപ്പോള്‍ അന്ന് ഇഷ്ടപ്പെടാതിരുന്ന "കോലങ്ങള്‍" ഇടയ്ക്കിടെ ഓര്‍ക്കുന്നു.

Jan 21	English	Gandhi	Attenborough
Feb 18	മലയാളം	അക്കരെ	കെ. എന്‍. ശശിധരന്‍
Mar 15	ബംഗാളി	പഥേര്‍ പാഞ്ചാലി	റായ്
Mar 15	English	Neighbours	McLaren
Mar 16	ബംഗാളി	അപരാജിതോ	റായ്
Mar 16	English	60 Cycles
Mar 17	ബംഗാളി	അപുര്‍ സന്‍സാര്‍	റായ്
Mar 17	English	Pas de Deux	McLaren
Mar 17	English	The Great Toy Robbery
May 1	കന്നഡ	പല്ലവി	പി. ലങ്കേഷ്
May 2	French	Far in the West
May 5	മലയാളം	എന്‍റെ മാമാട്ടിക്കുട്ടിയമ്മയ്ക്ക്	ഫാസില്‍
May 13	മലയാളം	കളിയില്‍ അല്പം കാര്യം	സത്യന്‍ അന്തിക്കാട്
May 15	മലയാളം	സാഗരസംഗമം	കെ. വിശ്വനാഥ്
May 26	മലയാളം	വീണ്ടും ചലിക്കുന്ന ചക്രം	പി. ജി. വിശ്വംഭരന്‍
May 27	English	Octopussy
Jun 2	English	Force Ten from Navarone	Guy Hamilton
Jun 15	Italian	The Bicycle Thieves	Vittorio De Sica
Jul 14	മലയാളം	ആരോരുമറിയാതെ	കെ. എസ്. സേതുമാധവന്‍
Jul 18	ഹിന്ദി	ഏക്‌ അഥൂരി കഹാനി	മൃണാള്‍ സെന്‍
Sep 14	മലയാളം	കായംകുളം കൊച്ചുണ്ണി	കെ. എ. തോമസ്‌
Sep 15	മലയാളം	ശ്രീകൃഷ്ണപ്പരുന്ത്	വിന്‍സെന്‍റ്
Sep 21	മലയാളം	ആരാന്‍റെ മുല്ല കൊച്ചുമുല്ല	ബാലചന്ദ്രമേനോന്‍
Oct 3	മലയാളം	ഇത്തിരിപ്പൂവേ ചുവന്ന പൂവേ	ഭരതന്‍
Oct 22	മലയാളം	കോലങ്ങള്‍	കെ. ജി. ജോര്‍ജ്ജ്
Nov 11	മലയാളം	പറന്നു പറന്നു പറന്ന്	പത്മരാജന്‍
Nov 12	ഹിന്ദി	ഏക്‌ ദൂജേ കേലിയെ	കെ. ബാലചന്ദര്‍
Nov 13	മലയാളം	അങ്ങാടി	ഐ. വി. ശശി
Nov 14	മലയാളം	താരാട്ട്	ബാലചന്ദ്രമേനോന്‍
Nov 15	ഹിന്ദി	കുര്‍ബാനി
Nov 15	മലയാളം	വൈകി വന്ന വസന്തം
Dec 5	English	ET: The Extra Terrestrial	Steven Spielberg
Dec 23	ഹിന്ദി	ബാഹു ബീഗം

<< കണ്ടെഴുത്ത്