Thursday, April 29, 2010

നാടോടുമ്പോൾ

(പ്രമോദിന്റെ കവിതയ്ക്ക്‌ ഒരു പ്രതികരണം)

പുരുഷകേസരിക്കൂട്ടം
നാരിമാരെ മുറപോലെ
കരുത്തോടെ ഭരിക്കുന്നൊ-
രിടത്തുപോയി

കുടിക്കാനായ്‌ തരുണികൾ
പബ്ബുകളിൽ കയറിയാൽ
തടിയ്ക്കും തന്റേടത്തിനും
കുഴപ്പമാകാം

****

മനുഷ്യദൈവത്തെ വാഴ്ത്തി
സ്തുതിച്ചു സന്തുഷ്ടരായി
മനുഷ്യന്മാർ വസിക്കുന്ന
സ്ഥലത്തുപോയി
അവരുടെ തലയ്ക്കുള്ളിൽ
വെളിവു നൽകുവാൻ പോയാൽ
അവന്റെ കാര്യവും തെല്ലു
പരുങ്ങലാകാം

****

സവർണ്ണന്മാർ അവർണ്ണനെ
നിലയ്ക്കുനിർത്തുവാൻ വേണ്ടി
അവമതിപ്പെടുത്തുവാൻ
മടിയ്ക്കാ ദിക്കിൽ
'അവർണ്ണൻ ഞാൻ, എനിയ്ക്കെന്താ
ചെരിപ്പിട്ടു നടന്നാ'ലെ-
ന്നവിവേകം വിചാരിച്ചാൽ
കെണിയായേക്കാം

****

ചെകുത്താൻ വേദപുസ്തകം
പിടിച്ചും കുന്തിരിക്കത്തിൻ
പുകച്ചുരുൾ പരത്തിയും
ചരിക്കും നാട്ടിൽ
അവന്റെ മേൽ വിരൽ ചൂണ്ടാൻ
മനുഷ്യപുത്രനുണ്ടായാൽ
അവനു വേദനിക്കുവാൻ
ഇടയുണ്ടാകാം

****

"പൊറുക്കുവാനൊരിക്കലും
കഴിയാത്ത പ്രമാദത്തെ
പൊറുപ്പിക്കും കലയേ രാ-
ഷ്ട്രീയമെഴുത്ത്‌"
പതിറ്റാണ്ടു പലതിനു
മുമ്പൊരുത്തൻ പറഞ്ഞതു
പതിരില്ലാതെയിപ്പോഴും
ശരിയാണല്ലോ




<< കവിതകള്‍
Post a Comment